Partitë e Koalicionit opozitar, gjatë ditës së sotme i kanë dërguar një letër KQZ-së duke i kërkuar që t’u jepet akses në kontrollimin e materialeve zgjedhore. Sipas tyre, kjo kërkesë vjen që të ketë transparencë të plotë me rezultatet e 30 qershorit të cilat ata i konsiderojnë të manipuluara.
Kërkesa në vetvete përfshin 8 elementë që opozita kërkon që t’u vihen në dispozicion nga ky institucion. Ndërkohë, për kërkesën e partive të opozitës, ku citohen edhe disa gjetje të Misionit të ODIHR, është vënë në dijeni dhe shefja e këtij Misioni, Audrey Glover.
8 elementët përfshirës që kërkohen nga opozita:
1. Kopje të printuara të listave zgjedhore për çdo qendër votimi.
2. Kopje e vërtetuar e Tabelës Përmbledhëse të rezultatit për zonën zgjedhore nga KQZ-ja.
3. Kopje të vërtetuara të Tabelave Përmbledhëse të rezultateve zgjedhore për çdo njësi të qeverisjes vendore nga KZAZ-ja.
4. Kopje të vërtetuara të tabelave të rezultateve për çdo qendër votimi nga grupet e numërimit.
5. Kopje të vërtetuara të procesverbaleve tip për mbylljen e votimit për qendër votimi.
6. Kopje të vërtetuara të listës së anëtarëve të administratës zgjedhore, të emëruar kryesisht nga KQZ dhe KZAZ përkatëse, duke specifikuar për secilin administratën zgjedhore në të cilën ai bën pjesë, sipas regjistrit të administrimit zgjedhor që mban KQZ-ja, për çdo qendër votimi, KZAZ dhe Grup Numërimi.
7. Kopje të regjistrimit të kamerave të të gjitha tavolinave të numërimit në çdo Grup të Numërimit të Votave.
8. Kopje të regjistrimit të kamerave të ambienteve të brendshme të KZAZ-ve.
