Kryeministri Edi Rama dha sot një lajm të mirë për të gjithë të moshuarit që në këto ditë janë detyruar të izolohen brenda në shtëpitë e tyre nga përhapja e koronavirusit.
Përmes një komunikimi live në Facebook, Rama bëri me dije se ditën e nesërme kur i gjithë vendi do të jetë në izolim, të privilegjuar do të jenë vetëm moshat e treta.
Kreu i qeverisë bëri me dije se të moshuarit mund të dalin për ajrosje ditën e nesërme, deri në orën 11 të paradites. Rama theksoi se ato duhet të jenë të shoqëruar vetëm nga një person.
“Nesër duke qenë se gjithçka është e mbyllur, pensionistët, mund të dalin. As për vizita, as për domino, por për ajrosje. Deri në 11 të paradites dhe jo më shume se me një person, po duke ruajtur distancën”, tha ai.
Kujtojmë se të moshuarit nuk janë lejuar të dalin nga shtëpitë e tyre, pasi sipas ekspertëve ata janë kategoria më e rrezikuar nga virusi që i ka marrë jetën mijëra njerëzve në të gjithë botën.
Duke filluar nga sot në orën 17:30 e deri të hënën në orën 05:00 të mëngjesit, vendi do të jetë në izolim të plotë.
