Një 29-vjeçar shqiptar është gjetur i vdekur pak ditë më parë në një burg të Anglisë.
Liridon Saliuka u gjet i pajetë në burgun e Belmarshit, teksa raportohet se kishte pësuar dëmtime të shumta në trup. Mediat britanike shkruajnë se shqiptari ka ndërruar jetën natën e 2 janarit, teksa Shërbimi i Burgjeve po heton akoma për të zbardhur çështjen.
Saliuka ishte nga Kosova por kishte edhe pasaportë britanike. Çështja po hetohet si një vetëvrasje, ndërsa familjarët e tij janë ankuar se autopsia është vonuar dhe nuk e kanë parë atë.
29-vjeçari ishte në paraburgim që nga vera e kaluar, kur u arrestua nën akuzat e vrasjes në lidhje me një të shtënë fatale në një klub në lindje të Londrës. Mediat britanike bëjnë me dije se në këtë burg ka pasur edhe viktima të tjera të dyshimta.
Motra e tij, Dita ka rrëfyer për mediat se 29-vjeçari i ishte nënshtruar një operacioni, pasi kishte bërë një aksident me makinë. Shqiptarit dhanë pllaka metalike që mund të qëndrojë në këmbë, ndërsa kishte marrë edhe raport nga kirurgu që të konsiderohet “me aftësi të kufizuara të përhershme”.
Ajo tha se ai u fut në burgun e Belmarshit në një qeli të veçantë me një dyshek ortopedik, por kohët e fundit ishte transferuar në një qeli standarde.
“Vëllai im tha që njerëzit që kryenin vetëvrasje ishin të dobët dhe egoistë. Kam dëgjuar nga të tjerët që atë ditë kishte pasur një grindje. Atë me siguri e kanë ngacmuar”, tha ajo për “The Guardian”.
