Pas sulmeve të njëpasnjëshme, kreu i shtetit Ilir Meta ka vendosur të ndalë “grushtin e shtetit” me “grusht shteti”. Presidenti ka vendosur të protestojë për largimin e qeverisë.
Dje gjatë një konference për mediat, Meta deklaroi se më 2 mars do të zbresë në bulevardin “Dëshmorët e Kombit”, dhe kërkoi ndihmën e qytetarëve që të ngrihen kundër qeverisë. Por ai nuk e ka lënë me kaq, duke përcjellë një tjetër mesazh që në orët e para të ditës së sotme. Kreu i Shtetit përsërit sërish ftesën ndaj qytetarëve, për ti dhënë paralajmërimin e fundit qeverisë.
Statusi
Të dashur qytetarë të Republikës së Shqipërisë!
Agresioni pushtues i Rilindjes ndaj të gjithë institucioneve të pavarura në vend është një realitet i hidhur që secili prej jush e ndjen çdo ditë. Por kokëfortësia e saj për të pushtuar me çdo çmim dhe në mënyrë jo vetëm antikushtetuese por edhe mafioze Gjykatën Kushtetuese përbën qartë një grusht shteti, me qëllim instalimin e një diktature të pakicës që ka tmerr nga liria e popullit shqiptar dhe kërkon të zhdukë çdo mundësi demokratike për ndryshim dhe llogaridhënie.
Ndaj ju ftoj të gjithëve në 2 Mars, në Bulevardin “Dëshmorët e Kombit” t’i japim paralajmërimin e fundit kësaj bande që nuk ka ditë që nuk përdhunon Kushtetutën dhe ligjet e vendit.
Nuk ka forcë në botë t’i kthejë shqiptarët 30 vite pas për të zbrazur Shqipërinë nga rinia jonë e mrekullueshme dhe për t’ia dorëzuar mafies ndërkombëtare të ardhmen e Atdheut tonë.
Ndaj në 2 Mars të bëjmë një Besëlidhje të Re për t’ia kthyer sovranitetin e humbur popullit shqiptar dhe rivendosur demokracinë, llogaridhënien dhe sundimin e Kushtetutës.
Shqipëria e para!
Shqiptaria e shqiptarëve!
Të martën në mbrëmje kryeministri u tall me kërcënimet e Metës, duke thënë se ai ka pas vetes popullin me të cilin komunikon në WhatsApp. Kjo e ka acaruar jashtë mase presidentin. “Në 2 mars ju presim të gjithëve në bulevardin “Dëshmorët e Kombit”, ku nuk do të ketë vetëm institucione siç është Presidenca, por të gjitha. Ata që kërkojnë popullin në WhatsApp të porosisin poture të gjëra”, tha Meta.
Ndonëse tentoi disa ditë më parë të bënte paqe me ambasadorët, Meta u është rikthyer dje sulmeve ndaj tyre. Ai ka arritur deri aty sa i ka cilësuar mafiozë dhe banda.
