Nëntë muaj pas vdekjes së 19-vjeçares Klea Muxhaj, e cila ndërroi jetë gjatë lindjes së foshnjes, sot është dhënë vendimi për pezullimin nga detyra të dy mjekëve të maternitetit “Dhimitër Çuçi” në Gjirokastër.
Bëhet fjalë për dy mjekët Dashamir Demiri, obstetër gjinekolog dhe Kostandin Hido, mjek anestezist. Nga hetimet e kryera ka indicie se dy mjekët nuk e kanë kryer siç duhet protokollin e lindjes. Atyre iu është ndaluar edhe dalja jashtë vendit. Dy mjekët janë të dyshuar për kryerjen e veprës penale “Neglizhencë në trajtimin mjekësor”.
E reja nga fshati Zhulat, ndërroi jetë në maternitetin e Gjirokastrës në orën 03:00, dhe shkak mësohet se janë bërë komplikacionet e rënda, pasi ka kryer operacionin në sallën e lindjes.
19- vjeçarja ishte shtruar në Maternitetin e Gjirokastrës dhe mjekët obstetër nuk dhanë garanci për të lindur vetë, duke e futur në sallën e operacionit. Komplikimet serioze që shfaqi, ndikuan në humbjen e jetës.
Prindërit kanë bërë fajtorë mjekët, për humbjen e vajzës së tyre. Sipas tyre, shkak është bërë neglizhenca e mjekëve, të cilët e kanë futur dy herë në sallën e operimit.
