19-vjeçari Ilirjan Hasanaj është dorëzuar në komisariat nga babai, referuar atentatit të shefit të Policisë Bashkiake. Shkak është bërë një konflikt pronësie, e ndërsa autori ka thënë se kur ka shtënë me armë, ka qenë i dehur. Report tv mëson se Ilirjan Hasanaj, autori i atentatit të shefit të Policisë Bashkiake në Shkodër, Mentor Hasanaj, është dorëzuar pasi është bindur nga babai i tij, përmes një telefonate kur ai qëndronte i fshehur në Velipojë.
Ndryshe nga autori 19-vjeçar i cili ka thënë se atentatin e ka bërë pas një konflikti që e kishte dëgjuar nga babai i tij, ky i fundit ka dëshmuar krejt të kundërtën. I ati i Ilirjan Hasanaj disa ditë më parë ka dëshmuar se me familjen e Mentor Hasanajt nuk kanë pasur asnjëherë konflikt. Këto janë dy deklarata kontradiktore mes babait dhe djalit të tij, që ngrenë dyshime mbi të vërtetën.
I riu ka dëshmuar para oficerëve të policisë se e ka qëlluar Hasanajn, pasi ishte në efektin e alkoolit, e se nuk ishte i vetëdijshëm për veprimin që po kryente. 19-vjeçari shpjegon se arsyeja e plagosjes lidhet dhe me faktin se mes tyre ka pasur një konflikt pronësie, të cilin e ka dëgjuar nga i ati. Ai përjashton përfshirjen e kushëririt në këtë histori, ndërsa thotë se është penduar për ngjarjen.
Nga ana tjetër Report Tv mëson se familja e shefit të policisë ka qenë e përfshirë në konflikt pronësie në 2008, por që s’ka lidhje me familjen e Ilirjanit. Ngjarja në 2008 ka ndodhur në Grufushë, por s’ka të dhëna me familjen e djalit.
