“Departamenti Shtetit ka hartuar një listë për shpalljen “non grata” të 15 zyrtarëve apo ish-zyrtarëve shumë të lartë shqiptarë,” deklaroi sonte analisti Lorenc Vangjeli në emisionin “Java” në RTSH.
Sipas analistit, arsyeja e ndalimit lidhet me të dhënat që mbledh Departamenti i Shtetit për përfshirje të zyrtarëve të lartë të vendeve të ndryshme në afera korruptive.
Ndalimi I hyrjes në SHBA i këtyre zyrtarëve parashikohet në legjislacionin amerikan. Mbi këtë bazë, Departamenti i Shtetit u ndaloi së fundi hyrjen në SHBA ish Prokurorit të Përgjithshëm, Adriatik Llalla dhe deputetit Tom Doshi.
Kjo ishte hera e parë që kjo masë aplikohej për zyrtarë dhe deputetë shqiptarë.
Madje për ish-Prokurorin Llalla, ambasadori Donald Lu deklaroi në një emision televiziv se është hera e parë në botë.
Deklarata e Lorenc Vangjelit paralajmëron se një fat të ngjashëm mund të kenë edhe 15 zyrtarë të tjerë.
Nëse një informacion i tillë konfirmohet atëherë në javët në vijim pritet që ujërat politike në Shqipëri të trazohen edhe më tepër, me pasoja që mund të shkojnë deri në dorëheqje të rëndësishme apo vakume institucionale.
Në raportin e DASH për vitin 2107 theksohet se korrupsioni ka prekur të gjitha degët e qeverisë. Në mungesë apo vonesë të drejtësisë, ndalimi i hyrjes në SHBA duket të jetë dënimi i parë me të cilin po përballen e do të përballen “peshqit e mëdhenj” në Tiranë.
