Qytetarët gjatë ditëve të fundit janë vënë në rrezik nga merimanga e zezë dhe gjarpri. Janë 9 raste që janë pickuar gjatë këtij sezoni, por fatmirësisht janë jashtë rrezikut për jetën.
Vetëm javën e fundit janë regjistruar 6 raste nga pickimi i merimangës së zezë, duke e çuar në total në 9 numrin e personave të pickuar gjatë sezonit.
Në spitalin Rajonal të Fierit janë paraqitur edhe banorë të zonës të pickuar nga zvarranikë dhe insekte.
Mjeku toksikolog, Lulzim Banushaj, i cili ka asistuar pacientët, ka bërë me dije se gjatë javës së fundit janë paraqitur edhe 4 raste të personave të kafshuar nga nepërka dhe gjarpri, duke e çuar në 6 numrin e personave të kafshuar nga zvarranikët gjatë kësaj vere.
Rastet në fjalë kanë ardhur nga zonat e Cakranit, Mallakastra, apo Roskoveci, ku fermerët në këtë periudhë janë të ekspozuar për shkak të punëve në bujqësi.
Mjekët thonë se të gjithë personat e pickuar nga merimanga dhe zvarranikët, i kanë shpëtuar rrezikut nga vdekja, pasi kanë mbërritur shpejt në spital. Ndërhyrja ka qenë e menjëhershme, duke bërë që pacientët t’ia hedhin pa asnjë rrezik.
