Analisti Fatos Lubonja ka komentuar me nota të ashpra vendimet e kryeministrit Rama, teksa deklaron se nëse ai nuk merr një sinjal të fortë, do ta prishë edhe godinën e teatrit.
I ftuar në rubrikën “Opinion” në News24, Lubonja foli edhe për datën 13 tetor, e cila është dekretuar nga presidenti Meta për zhvillimin e zgjedhjeve. Ai shprehet se nuk beson që në këtë datë të zhvillohen 3 zgjedhje (vendore, të përgjithshme dhe presidenciale) ndërsa shprehet se Rama po tenton të kapë edhe Gjykatën Kushtetuese për t’i shpëtuar 13 tetorit.
“Jemi në një nivel mizerabël. Nëse nuk merr një sinjal të fortë Edi Rama, do ta prishë edhe teatrin dhe do vazhdojë përpara. Se si do ta marrë sinjalin, këtë nuk e di. Ne jemi ankuar dhe më parë, por nivelet e vjedhjeve që po shohim tani me rrugët, janë të jashtëzakonshme, është çmenduri totale.
Debati nuk bëhet me deklarata publike, por duke u ulur, madje jashtë kamerave. Opozita duhet të dalë me një opsion, jo me dy. Problemi ynë është ky: sikur të kishte drejtësi, shumë prej këtyre do të iknin vetë. Për 13 tetorin nuk është punuar shumë dhe problemi është nëse do ta pranojë Rama. Nuk kam besim që mazhoranca me Ramën në krye mund t’i rikthehet mundësisë së zgjedhjeve. Projekti është që edhe Gjykata Kushtetuese të kapet nga mazhoranca dhe jemi në regjimin e komunizmit dhe do ngrihet sërish pikëpyetja se si duhet rrëzuar ky regjim”, tha Lubonja.
I pyetur nëse kjo qeverisje nuk do mund të rrëzohet dot, Lubonja shprehet se nuk beson që njerëzit të jenë aq budallenj sa ta votojnë sërish Erion Veliajn.
“85% e njerëzve nuk kanë votuar. Njerëzit janë të lodhur me politikën. Unë e di që edhe ata që kanë votuar për socialistët, nuk votojnë më. Ai që voton Erion Velijan ose është trutharë .. Unë nuk mendoj se shqiptarët janë aq budallenj. Ka një zhgënjim të madh. Ata që nuk votojnë, nuk votojnë se janë të zhgënjyer nga politika në përgjithësi. Por duke parë që PS po shkon nga shiu në breshër, opozita duhet të punojë me njerëzit, t’i takojë. Plani shkatërrimtar i Ramës është afatshkurtër, ai mund ta mbajë pushtetin dhe për ca”, u shpreh analisti.
Lubonja foli edhe në lidhje me protestat e zhvilluara për godinën e Teatrit Kombëtar, teksa i pyetur nëse shoqëria është e shqetësuar ai u përgjigj:
“Jo, e sëmurë, që herë reagon, herë bie. Sëmundja avancon, reagon dhe bie organizmi, por degradimi është i qartë. Ndjesia që nuk ka shtet të qytetarëve, por shtet të kapur nga një bandë, e ke kudo. Ne jemi ankuar dhe më parë, por nivelet e vjedhjeve që po shohim tani me rrugët, janë të jashtëzakonshme, është çmenduri totale. E rënda është se grupi i njerëzve që përfiton është i kapur nga një parti dhe është gjithnjë e më i vogël. Në këtë aspekt, degradimi është shumë evident. Rama vetë bënte dikur konkurse për të ndërtuar ndonjë kullë, po keni parë tani të ndodhë? As nuk dihet fare, e kapin trafikantët”, deklaroi ai.
