Ashtu siç është njoftuar nga autoritetet në vendin tonë, kopshtet dhe çerdhet pritet të hapen më datën 1 Qershor.
Ndërkohë raportohet se edukatorët dhe stafi ndihmës kanë nisur pastrimin dhe dezinfektimin e të gjitha ambienteve.
Kësisoj, asgjë nuk do të jetë si më parë!
Që nga hyrja e fëmijëve, higjiena ndaj e tyre, qëndrimi në grup, ngrënia e drekës dhe fjetja, do të bëhen në distancë dhe me rregulla të reja.
Çdo prind duhet të nënshkruajë miratimin e protokolleve të reja.
Drejtoresha e qendrës së zhvillimit dhe edukimit të fëmijëve sqaron për “A2” se si zbatohet qëndrimi i të vegjëlve në grupe me rregullat e reja.
“Nga 8000 fëmijë që kemi vetëm në Tiranë, në qytet, gjatë muajve të verës ka diku te 3000-4000 fëmijë. Kjo është në favorin tonë. Nëse më parë në një grup, kishim 30 fëmijë, tani do të bëjmë maksimumin që në këtë sipërfaqe të mos i kalojmë 10 ose 12 fëmijë”, thotë Zhaneta Beqiri.
Prioritet do të jenë fëmijët e prindërve që janë në marrëdhënie pune.
“Besoj që prindërit do të tregohen mirëkuptues dhe ata që do të kenë mundësi për t’i mbajtur në ambientet e shtëpive do të jetë plus i shtuar për të garantuar cilësinë e këtij shërbimi”.
Në mbyllje të çdo dite, edukatorët e kopshtit do të bëjnë dezinfektimin e të gjitha ambienteve dhe mjeteve didaktike, ndërsa nuk do të lejohet përdorimi i lodrave prej pelushi.
Sipas informacioneve të drejtorisë së kopshteve, deri tani, nga fëmijët që frekuentojnë këto institucione si dhe prindërit e tyre, nuk rezulton asnjë i prekur me COVID-19.
