Ambasada Amerikane u ka dhënë një mesazh mjaft të qartë klasës politike, lidhur me masat për koronavirusin. Në një postim në Facebook, Ambasada nënvizon se kjo është një kohë për veprime të qeta dhe praktike nga publiku, dhe veprime të shpejta e të përgjegjshme nga të gjithë udhëheqësit. Në faqen zyrtare, po kështu citohet se do të vijojnë të mbështesin përpjekjet e qeverisë së Shqipërisë, për frenimin e koronavirusit.
“COVID-19 kërkon që cilido në Shqipëri – pavarësisht se kush je – të bashkohet në frymë dhe në veprime. Ashtu si Presidenti Meta, Kryeministri Rama dhe Kryetari i Partisë Demokratike Basha ranë dakord së bashku, kjo është një kohë për veprime të qeta dhe praktike nga publiku, dhe veprime të shpejta e të përgjegjshme nga të gjithë udhëheqësit. Në këtë drejtim, edhe Ambasada do të zbatojë masat mbrojtëse bazë ndaj COVID-19 të rekomanduara nga OBSH-ja, përfshirë mbajtjen e largësisë midis personave dhe masa të rritura personale higjenike, si larja e shpeshtë e duarve. Do të vijojmë të mbështesim përpjekjet e qeverisë së Shqipërisë për të udhëhequr një përgjigje të bashkërenduar dhe transparente, e cila i mban të gjithë njerëzit në Shqipëri sa më të sigurtë, të shëndetshëm dhe të informuar që të jetë e mundur”.
10 është numri i të infektuarve me koronavirus në Shqipëri. Në mbledhjen e qeverisë që po mbahet, kryeministri Rama i është përgjigjur akuzave të opozitës në lidhje me maskat e skaduara që i janë shpërndarë stafit të mjekëve dhe infermierëve.
Rama tha se maskat kanë ardhur si dhuratë nga Kanadaja për një shoqatë bamirëse, dhe i janë shpërndarë stafit mjekësor për t’u mbrojtur.
Gjatë fjalës së tij, Rama tha se nuk është koha për disa Task-Forca, por se duhet të bashkohemi për të luftuar kundër koronavirusit.
