Mbytja në ujë, është shkaku i tretë kryesor i vdekjeve në mbarë botën. Çdo vit në këtë mënyrë gjejnë vdekjen rreth 360.000 njerëz, ose 1 mijë në ditë. 90% e vdekjeve ndodhin në vendet me të ardhura të ulëta dhe të mesme. Shkalla e vdekshmërisë nga mbytja është më e larta në Afrikë, 15-20 herë më e lartë se në Gjermani apo Britani.
Në SHBA, vetëm mbytjet në det shkaktojnë një kosto direkt dhe indirekte prej 273 milionë $. Moshat më të prekura janë fëmijët 1-4 vjeç, të ndjekur nga fëmijët 5-9 vjeç. Këtu përfshihen fëmijët që jetojnë pranë kanaleve, liqeneve, pishinave, apo detit. Edhe në Shqipëri, mbytja është një problem serioz, sidomos gjatë sezonit të verës.
Pavarësisht ligjeve në fuqi, në shumë plazhe nuk ekzistojnë fare kullat e vrojtimit. Ose janë të pakta në numër, dhe nuk mbulojnë të gjithë zonën. Ekspertët japin rekomandime, që janë thelbësore për të shmangur ngjarje të tilla tragjike. Ata rekomandojnë të mos hyhet menjëherë në det pasi është konsumuar alkool, ushqim, apo kur jeni tejet të djersitur nga vapa.
Gjithashtu këshillohet të evitohet larja kur dallgët janë mbi gjysmë metri, të notohet gjithmonë paralel me bregun, për të shmangur thellësitë e mëdha. Disa këshilla të tjetra janë:
- Mos notoni kurrë vetëm.
- Shmangni panikun në ujë
- Nëse nuk dini mirë not, mos u përpiqni të ndihmoni dikë tjetër që është në rrezik./ TIRANA TODAY
