Kryeministri komentoi sot në Kongresin e PS-së vendimin e gjykatës për dënimin e ish-zëvendësministres së Brendshme, Rovena Voda, për “shpërdorim detyre”, me 10 muaj burg. Kreu i qeverisë Edi Rama tha se nuk e di ende nëse drejtësia shqiptare po vonon apo ngurron të hyjë në atë që ai e quajti “kraterin e vullkanit të padrejtësive 30 vjeçare”.
“Për të bërë detyrën, ishte zgjedhur edhe kush e dogji Shqipërinë në zjarrin e piramidave e kush i hodhi në erë njerëzit pak kilometra nga sheshi kryesor i Tiranës, e kush i vrau protestuesit e pafajshëm në bulevard.
Një tjetër histori në këtë mes që drejtësia e re ende po vonon apo po ngurron nuk e di akoma këtë, që të hyjë në kraterin e vullkanit të padrejtësive 30 vjeçare. Ndërkohë që dënon një zyrtar të lartë për një ark peshk, në këmbim të një punësimi të pakryer, por për këtë mbase do flas pak më tej”.
Gjykata e Posaçme dënoi me 10 muaj burg ish-zv.ministren e Brendshme, Rovena Voda, e cila u vu në pranga pasi mori ryshfet për të punësuar një person në ministri. Voda u dënua me 1 vit e 3 muaj burg, por për shkak të gjykimit të shkurtuar, ish-zv.ministrja do të vuaj vetëm 10 muaj në qeli.
Po ashtu edhe dy të pandehurat e tjera, Florida Beu dhe Majlinda Hasani janë dënuar me nga 10 muaj burg. Kujtojmë se SPAK kërkoi dënimin me 1 vit e 6 muaj burg për ish-zv.ministren e Brendshme, Rovena Voda dhe nga 15 muaj për Florida Beun dhe Majlinda Hasanin.
