Gjatë 24 orëve të fundit, 3 qytetarë e kanë humbur betejën me COVID-19. Një 44 vjeçare nga Durrësi, një pacient 71 vjeçar nga Tirana dhe një pacient 85 vjeçar gjithashtu nga Tirana. Po kështu vijon të ketë shtrime në Spitalin Infektiv, ku aktualisht po trajtohen 79 pacientë, 7 prej tyre janë në terapi intensive, ndërsa 3 janë të intubuar. Janë kryer 371 testime për të dyshuar të prekur me COVID-19, nga të cilat janë konfirmuar 69 raste pozitive.
Siç duket edhe nga shifrat në fjalë, situata nuk po njeh përmirësim. Këshilli i BE-së ka miratuar sot listën e vendeve të cilat do u hiqet kufizimi i udhëtimit prej 1 korrikut. Për fat të keq, në këtë listë nuk figuron Shqipëria.
Lista është miratuar me shumicë të cilësuar nga 27 shtetet anëtare të Bashkimit Europian, ku përfshin 14 shtete: Algjeri, Australi, Kanada, Gjeorgji, Japoni, Mali i Zi, Marok, Zelanda e Re, Ruanda, Serbia, Korea e jugut, Tajlandë, Tunizi, Uruguay.
Në njoftimin e Këshillit Europian thuhet se lista do të përditësohet sërish pas 14 ditësh. Pyetja e cila lind krejt natyrshëm është: A do të ketë shpresë Shqipëria që të mund t’i hapen kufijtë pas dy javësh? Me mjaft rëndësi mbetet ecuria nga koronavirusi, ku do të ndikojë në vendimin e ardhshëm të BE-së.
