Zyrtarë të Departamentit të Shëndetësisë në varësi të Guvernatorit Andrew Cuomo konfirmuan njoftimet e së enjten në mbrëmje se anëtarët e një grupi pune mbi COVID-19-n, kishin ndryshuar një raport të shtetit të Nju Jorkut mbi shtëpitë e të moshurave, duke mos pasqyruar numrin e plotë të banorëve që kishin humbur jetën nga koronavirusi. Por zyrtarët këmbëngulën që ndryshimet ishin bërë për shkak të shqetësimeve në lidhje me saktësinë e të dhënave.
Duke cituar dokumente dhe persona në dijeni të diskutimeve brenda administratës, gazetat “Wall Street Journal” dhe “New York Times”, shkruanin se ndihmësit, përfshirë sekretaren e guvernatorit, Melissa DeRosa kishin shtyrë zyrtarët e shëndetësisë së shtetit të Nju Jorkut të ndryshonin raportin e muajit korrik, duke përfshirë vetëm ata banorë që kishin vdekur brenda objekteve të kujdesit afatgjatë shëndetësor dhe jo ata që ishin sëmurë aty, por që kishin vdekur më pas nëpër spitale.
Kjo është goditja më e fundit ndaj Guvernatorit Cuomo, i cili është rrethuar nga dy skandale, një që përfshin trajtimin nga ana e tij të vdekjeve në shtëpitë e të moshuarve dhe akuzat për ngacmimë seksuale nga dy ish-ndihmëse të tij dhe një grua, të cilën ai e kishte takuar gjatë një ceremonie martesore.
Zoti Cuomo kërkoi falje të mërkurën që kishte vepruar siç tha “në një mënyrë që i kishte bërë të tjerët të viheshin në siklet”, por refuzoi thirrjet për dorëheqje. Ai tha se do të bashkëpunonte plotësisht me hetimin e nisur nga zyra e Prokurorit të Përgjithshëm të shtetit mbi akuzat për ngacmim seksual. Ndërkohë hetuesit federalë po shqyrtojnë me kujdes mënyrën se si administrata e tij ka trajtuar të dhënat mbi shtëpitë e të moshuarve.
Disa nga demokratët kryesorë të këtij shteti kanë thënë se po presin përfundimin e hetimeve përpara se të dalin në një përfundim në lidhje me sjelljen e zotit Cuomo. Por pas artikujve të së enjtes në mbrëmje, disa ligjvënës të shtetit ripërsëriten thirrjet që guvernatori të dorëhiqet ose të shkarkohet.
“Cuomo fshehu shifrat. Të nisin procedurat për shkarkimin e tij”, shkruante anëtari i Asamblesë së lagjes Kuins të Nju Jorkut, Ron Kim.
Raporti i muajit korrik mbi shtëpitë e pleqve u lëshua për të hedhur poshtë kritikat ndaj zotit Cuomo mbi një direktivë të 25 marsit që ndalonte shtëpitë e pleqve të refuzonin pacientët me koronavirus, të cilët kishin dalë nga spitalet. Disa shtëpi pleqsh u ankuan në atë kohë se politika mund të ndihmonte në përhapjen e virusit.
Raporti arriti në përfundimin se politika nuk luajti asnjë rol në përhapjen e infeksionit.
Analiza e shtetit bazohej pjesërisht në atë që zyrtarët thanë në atë kohë se ishte një statistikë e pasaktë. Në raport thuhej se 6,432 persona kishin vdekur në shtëpitë e pleqve të shtetit.
Zyrtarët shtetërorë pranuan edhe atëherë që numri i vërtetë i vdekjeve ishte më i lartë për shkak të përjashtimit të pacientëve që kishin vdekur në spitale, por ata nuk pranuan në atë kohë të jepnin ndonjë vlerësim mbi numrin edhe më të madh të vdekjeve, duke thënë se shifrat ishin ende duke u verifikuar.
Gazetat “Times” dhe “Journal” raportuan se në fakt projekt-raporti e përfshinte shifrën, më shumë se 9,200 vdekje, për të cilën më pas ndihmësit e zoti Cuomo thanë se duhej të ndryshohej.
Zyrtarët shtetërorë insistuan të enjten se korrigjimi u bë për shkak të shqetësimeve në lidhje me saktësinë dhe jo për të mbrojtur emrin e zotit Cuomo.
“Ndërsa variantet e hershme të raportit përfshinin vdekjet jashtë institucioneve (azileve), grupi i punës mbi COVID-in nuk ishte e kënaqur që të dhënat ishin verifikuar në kundërshtim me të dhënat e spitaleve dhe kështu raporti përfundimtar përdori vetëm të dhënat mbi vdekjet brenda institucioneve, të cilat u shfaqën në raport“, tha zëdhënësi i Departamentit të Shëndetësisë Gary Holmes.
Shkencëtarët, profesionistët e kujdesit shëndetësor dhe zyrtarë të zgjedhur e patën sulmuar raportin në atë kohë lidhur me metodologjinë e gabuar dhe statistikat selektive.
Sekretarja e Shtypit e Shtëpisë së Bardhë Jen Psaki tha të premten se pretendimet se ndihmësit e zotit Cuomo kishin manipuluar raportimin publik mbi numrin e vdekjeve në shtëpitë e pleqve ishin “shqetësuese”. Ajo tha se Shtëpia e Bardhë “do të mbështeste çdo hetim të pavarur” mbi këtë çështje./VOA/
