Emigrantët shqiptarë që udhëtojnë në mënyrë të paligjshme në Britaninë e Madhe, vijojnë të jenë në fokus të diskutimeve të forta mes politikanëve të dy vendeve. Numri i lartë i tyre ka ngjallur polemika në poltikën britanike. Kreu i qeverisë Edi Rama madje ka akuzuar Sekretaren e Brendshme Britanike, Suella Braverman për “nxitjen e ksenofobisë”, pas deklaratës së saj ku e cilësoi ardhjen e shqiptarëve në Britaninë e Madhe si “pushtim”, duke i etiketuar si kriminelë. Lidhur me këtë çështje të nxehtë, emigrantët shqiptarë kanë paralajmëruar sot një protestë në Mbretërinë e Bashkuar.
Të indinjuar nga këto përcaktime, emigrantët shqiptarë kanë paralajmëruar sot një protestë në “Westminster Bridge”. “Protestë kundër poshtërimit të shqiptarëve në Britani”, shkruhet në posterin e shpërndarë në rrjetet sociale.
Rreth 40 mijë emigrantë kanë hyrë në mënyrë të paligjshme në Angli, mes tyre 12 mijë shqiptarë. Shumica prej tyre sipas autoriteteve britanike janë meshkuj dhe në gjendje të mirë fizike. Sekretarja e Brendshme, Suella Braverman shkaktoi revoltë pasi tha se emigrantët po “pushtojnë” Mbretërinë e Bashkuar. Kryeministri Edi Rama u shpreh se këto komente janë të tepërta, dhe se shqiptarët nuk janë problemi.
