Tashmë është zyrtare, Zinedin Zidan nuk është më trajneri i Realit të Madridit. Klubi madrilen, nëpërmjet faqes zyrtare njofton largimin e francezit. Në njoftimin në fjalë thuhet se është koha për të respektuar vendimin e tij, dhe për të treguar vlerësimin për profesionalizmin, përkushtimin dhe pasionin e tij në gjithë këto vite.
“Real Madrid njofton se Zinedine ka vendosur të mbyllë bashkëpunimin si trajner i klubit tonë. Tani është koha për të respektuar vendimin e tij, dhe për të treguar vlerësimin tonë për profesionalizmin, përkushtimin dhe pasionin e tij në gjithë këto vite, si dhe për atë që ai përfaqëson si figurë për klubin e Real Madrid.
Zidane është një nga mitet më të mëdha të Real Madrid dhe legjendat e tij shkojnë përtej asaj që ai ka qenë trajner dhe lojtar i klubit tonë. Ai e di që është në zemër të Real Madrid dhe se ky klub është dhe do të jetë gjithmonë shtëpia e tij”, shkruhet në komunikatën e klubit spanjoll.
