Pak më herët u raportua se një foshnje ishte infektuar nga COVID-19, ndonëse nuk kishte një njoftim zyrtar nga Ministria e Shëndetësisë. Por Ministrja e Shëndetësisë e ka konfirmuar, duke thënë se për herë të parë është prekur nga virusi një foshnje 2 muajshe.
“Kemi një rast sot në fakt, të një fëmije 2 muajsh që është shtruar në Spitalin Pediatrik në shërbimin e Infektivit. Që i ka dhënë pasojë Covidi. Rasti i parë që kemi një fëmijë të shtruar në pediatrinë e QSUT, që kërkon trajtim mjekësor së bashku me nënën e vetë”, u shpreh ministrja Manastarliu në studion e “Opinion” në Tv Klan.
Ndër të tjera, Manastirliu tha se izolimi është përjashtuar si mundësi. “Unë kam qenë në një mbledhje të gjatë të Komitetit Teknik të Ekspertëve, ku kemi diskutuar të dhënat edhe se si do të shkojnë projeksionet në javët në vijim. Nuk vlerësohet që do të kemi, të paktën me projeksionet që ne vlerësojmë, të kthehemi në izolim apo në masa kufizuese. Por vlerësohet që do të jemi në të njëjtat trende të epidemisë”.
