Zyrtare/ FSHF-ja gjobitet nga UEFA, e pëson dhe Bjellorusia

Federata Shqiptare e Futbollit, (FSHF) ka marrë një gjobë nga UEFA. Komisioni i Kontrollit, Etikës dhe Disiplinës (CEDB) gjobiti FSHF-në me 5 mijë euro për mosrespektimin e protokollit të “Return to play” të përcaktuar nga institucioni i futbollit europian.

Për ndeshjen e 18 nëntorit Shqipëri-Bjellorusi 3-2, e luajtur në “Air Albania”, Disiplina e UEFA konstatoi se pala shqiptare nuk ka respektuar detyrimet organizative dhe mjekësore për mbarëvajtjen e ndeshjes me bjellorusët. Ndërkohë, pa shpëtuar nuk ka mbetur as Federata e Bjellorusisë.

Pala bjelloruse është gjobitur me 6 mijë euro për shkak të sjelljen e gabuar të ekipit në fushën “Air Albania”-s pas përfundimit të takimit me kuqezinjtë, ku pati mosmarrëveshje mes palëve. Masa penalizuese duhet të shlyhet brenda 90 ditëve nga të dyja palët.