Verën e vitit 1997, flitej për rekrutimin e burrave nga veriu i vendit, për tu rreshtuar përkrah forcave të Gardës, për shtypjen e revoltave në qytetet e jugut. Zylfie Haklaj tregon mesazhet që Sali Berisha, i dërgonte nëpërmjet të afërmve të tyre. Protagonist kryesor shndërrohet djali i katërt i familjes, Fatmiri. Komiteti i Shpëtimit që ishte ngritur pas trazirave, e zgjedh Fatmirin Shef të Komisariatit të Tropojës në moshën 28-vjeçare. Ajo rrëfen se në atë kohë, Berisha dërgon forca nga Garda kryesisht Sokol Mulosmanin, kushëri i dajave të tyre, për të takuar Fatmirin, për ti kërkuar mbështetjen e tij. Por Fatmiri ka kundërshtuar.
“Sali Berishës i rrezikohet pushteti si president dhe dërgon forca nga Garda, kryesisht Sokol Mulosmanin, kushëri i dajave tonë, për të takuar Fatmirin, për ti kërkuar mbështetjen e tij. Dhe Fatmiri i thotë shprehimisht që as për Hamdiun nuk e bëjë këtë punë që të sulmoj jugun, vëllezërit e jugut për të mbrojtur karrigen e presidentit”, rrëfen Zylfie Haklaj.
Fatmiri nuk u mjaftua me kaq. Ai pengoi të niseshin drejt këtij misioni djemtë e tjerë tropojanë, që kishin vendosur ti përgjigjeshin pozitivisht thirrjes. Pas përplasjeve që kishin pasur me Sali Berishën, dikur mik i familjes, ata identifikoheshin si mbështetës të krahut të majtë. Zylfie Haklaj ka konfirmuar se vëllezërit e saj nuk kanë patur kontakt me Fatos Nanon, ndryshe nga çfarë ka pretenduar Berisha.
“Vëllezërit në kontakt me Fatos Nanon që thotë Berisha, kurrë s’kanë pasur kontakt me Fatos Nanon. As me udhëheqësit e lartë, Halili, vëllai ka jetuar në Tiranë, ka takuar udhëheqës por jo se ka pasur ndonjë shoqëri”, rrëfen Zylfie Haklaj, motra e Haklajve.
