Numri i pasgoditjeve që kanë lëkundur Shqipërinë pas tërmetit të fortë 6.4 ballë ka nisur të rrallohen tashmë. Qendra Sizmologjike Europiane e Mesdheut (EMSC) shkruan se pasgoditjet kanë ardhur duke u kufizuar, që nga dita e martë, kur ndodhi goditja kryesore.
“Siç pritej pas një tërmeti numri i pasgoditjeve sa vjen dhe ulet. Ende, lëkundje ndihen në zonën e prekur nga tërmeti. Por aktiviteti i pasgoditjeve nga tërmeti në Shqipëri është kufizuar. Shpresojmë që kufizimi i aktivitetit të pasgoditjeve të vijojë që miqtë tanë dhe njerëzit në Shqipëri të munden të qëndrojnë të qetë” thuhet në postimet e (EMSC).
Prej tërmetit katastrofik që tronditi vendin mëngjesin e së martës, janë regjistruar mbi 1,000 pasgoditje, disa me intensitet të lartë deri në 5.4 Rihter.
Zonat më të prekura nga tërmeti ishin Durrësi, Thumana, Lezha, Kavaja dhe fshatrat përreth.
