Prokurorët zviceranë kanë nisur hetimet kundër kreut të trupit botëror të futbollit, Gianni Infantino.
Hetimet ndaj tij kanë nisur lidhur me një takim sekret që supozohet se është mbajtur mes FIFA-s dhe prokurorit të përgjithshëm zviceran në detyrë, Michael Lauber.
Ky i fundit dha dorëheqjen javën e kaluar, pasi një gjykatë tha se ka fshehur të dhënat mbi takimin dhe ka gënjyer ndaj eprorëve të tij gjatë hetimeve për korrupsion mes radhëve të FIFA.
“Si president i FIFA, ka qenë qëllimi im kryesor prej ditës së parë të ndihmoj autoritetet në hetimet me shkeljet e kaluara. Zyrtarët e FIFA-s janë takuar me prokurorët e të gjithë vendeve të botës për këtë qëllim”, thuhej në deklaratën zyrtare të Infantino.
Zyra e Lauber tha se ai tashmë ka ofruar dorëheqjen të martën dhe se dita e tij e fundit në punë do të jetë 31 gushti.
