Shqipëria vijon të mbetet jashtë hartës së prekur nga koronavirusi, gjë e cila po habit edhe Organizatën Botërore të Shendetësisë. Dje, në mbledhjen e Task-Forcës për masat nga koronavirusi, ministrja e Shëndetësisë, Ogerta Manastirliu, u shpreh se në vend janë testuar gjithsej 42 raste, të cilët kanë rezultuar të gjithë negativë.
Lidhur me këtë çështje, deputeti Ralf Gjoni iu drejtua kryetarit të Kuvendit, Gramoz Ruçi, që në rendin e ditës të futet edhe një raportim për masat që Shqipëria ka marrë për parandalimin e koronavirusit.
Kryeparlamentari Ruçi tha se për këtë kërkesë duhet ndjekur rruga procedurale, duke e rrëzuar atë.
“Të futet në rend dite para se të jetë vonë në përhapjen e një epidemie, se përse në Shqipëri nuk ka asnjë rast me koronavirus.
Zoti e ndaloftë dhe na ruajt nëse këtu ka një përhapje të koronavirusit të padetektuar. Mos të ecim me anekdota; “hë mos se nuk ka gjë se kap të vjetrit”. Zoti kryetar kërkojini kryeministrit që sot në rendin e ditës të bëhet raportim sa i përket informacionit që qeveria ka për koronavirusin”.
Gramoz Ruçi: “Jo më larg se dy ditë, ministrja Ogerta Manastirliu, pa e kërkuar asnjë nga deputetët më ka kërkuar mua ta informoj Kuvendin për masat që ka marrë Shqipëria. Nëse kjo nuk është e plotë, ju i dini si kërkohet ministrja dhe kryeministri në interpelancë, ndiqni procedurat parlamentare. Por kërkesa juaj nuk mund të merret në konsideratë sot për sot.
Drejtori i Zyrës së OBSH në Tiranë, Raul Gonzales u shpreh se po përpiqen të kuptojnë përmes një studimi se pse në Shqipëri nuk ka ende asnjë rast të prekur nga koronavirusi. “Por pse ndodh që në Shqipëri nuk ka? Ne ende jemi duke studiuar”, u shpreh Gonzales.
