Sikundër është bërë e udhës, kryeministri Rama ka njoftuar në lidhje me masat e reja sesi do të procedohet në ditët në vijim. Ai njofton se nga e hëna e ardhshme, në zonat e kuqe do vijohet me të njëjtat rregulla. Këtu u referohet bashkive Shkodër, Kurbin, Krujë, Durrës, Tiranë dhe Fier, ku do të vazhdojë i njëjti regjim oraresh lëvizjeje dhe rregullash të qarkullimit si deri më tani.
Këto zona do të blindohen me postblloqe, dhe nuk do të lejohet hyrje-dalja e automjeteve të paautorizuara. Sakaq, pjesa tjetër e vendit e cila është zonë e gjelbër, do aplikohet një fashë tjetër orari.
Qarkullimi ndërqytetas me automjet privat brenda gjithë kësaj pjese do të jetë i lirë, me një regjim orar që do të shtrihet deri në orën 21:00.
Për këtë pjesë do të mbeten në fuqi vetëm rregullat që ndalojnë grumbullimin e më shumë se pesë personave, aktivitetet kulturore e sportive të çdo lloji, transportin publik si edhe njësitë ekonomike ende të mbyllura.
Referuar fundjavës, në të gjithë vendin do të lejohen të qarkullojnë vetëm automjetet që kanë autorizim për punë, dhe dalja e këmbësorëve do të bëhet me dy fasha. Deri në orën 09.30 vetëm pensionistët dhe nga ora 10.30 deri në 17.30 prindërit me fëmijët deri në 14 vjeç.
Rama po kështu thekson se nëse situata mbetet me këto ritme, ku shifrat nuk janë në trend rritës, kjo do të jetë fundjava e fundit me ndalim daljeje për vajzat e djemtë mbi 14 vjeç.
