Një 30-vjeçar shqiptar deklarohet i zhdukur që prej datës 30 prill.
Sipas mediave italiane, i zhdukuri Dorian Liçaj, doli mbrëmjen e 30 prillit nga Marina di Ragusa, ku ai ishte mysafir te kushërinjtë e tij dhe nga ajo kohë nuk ka më asnjë lajm prej tij.
I riu ndodhej në Itali nga janari dhe prej disa ditësh ndodhej në fshatin bregdetar Iblean në kërkim të një pune.
Sipas dëshmive, Liçaj është larguar të martën në mbrëmje me një biçikletë të kuqe, ndërsa familjarët tregojnë se ai kishte me vete dokumente shqiptare dhe një telefon celular, i cili aktualisht del i fikur. Ndërsa nuk dihet se çfarë rrobash kishte veshur para se të largohej.
Po ashtu, të afërmit kanë deklaruar se shqiptari vuante nga ankthi dhe para se të zhdukej, kishte lënë një shënim me dorë për familjen, në të cilën kërkonte ndjesë për vuajtjet që do t’u shkaktonte, duke lënë dyshime të forta për një vetëvrasje.
Ai është rreth 1.80 m i gjatë dhe familja, dhe policia kërkon ndihmën e qytetarëve duke bërë apel se në rast se e shikojnë të telefonojnë menjëherë në numrin 11.
