Hekuran Billa u ekzekutua te ‘Komuna e Parisit’, pranë qendrës tregtare Kristal. Personi kryesor mbi të cilin bien dyshimet është Viktor Marku, i cili është vëllai i Prel Markut, i cili u vra nga Billa në vitin 2006 në Angli.
Hekuran Billa është një emër i njohur për drejtësinë angleze. Ai është dënuar me burgim të përjetshëm për vrasjen e Prel Markut, ngjarje e ndodhur në 2006. Ai u shpall fajtor për tre akuza, “Vrasje” , “Vrasje e mbetur në tentativë” si dhe “Plagosje me dashje”. Ekzekutimi i tij ka sjellë nxjerrjen në dritë rastin e një të dënuari me burgim të përjetshëm, por që shëtiste i lirë dhe me BMW X6 në Shqipëri.
Sakaq, autori i dyshuar ende nuk po gjendet nga ana e policisë, për t’u marrë në pyetje. Burime për ‘Dosja.al’ bëjnë me dije se Marku është kërkuar në zonat veriore të vendit dhe në Tiranë, por nuk është gjetur askund. Madje ai as nuk ka dalë nga vendi, ndërsa familjarët janë shprehur se kohët e fundit nuk kanë pasur kontakte me 34-vjeçarin.
