Në konferencën e fundvitit me gazetarët, Rama është pyetur për votën e Shqipërisë kundër SHBA-ve në OKB.
Kryeministri bëri një krahasim për shtete tjera aleate të Amerikës që votuan kundër saj, duke lënë të kuptohet se vota nuk do të thotë që jemi kundër SHBA-ve.
Po ashtu, Rama u nxeh teksa tha se kjo është një idiotësi që mediet shqiptare i japin rëndësi, duke theksuar se jemi një vend i vogël me pozicione dinjitoze.
PËRGJIGJA E RAMËS:
Britania e Madhe mes zgjodhi mes Amerikës dhe Turqisë, Turqinë? Ajo është aleati më i madh strategjik i Amerikës dhe ka votuar njësoj si ne. Japonia, një tjetër aleat shumë i rëndësishëm i Amerikës ka votuar si ne.
Meqë na bëtë qendrën e botës me ndihmën e presidentit tonë, edhe unë po flas si qendra e botës. Ç’është kjo pyetje se s’e kuptoj.
Jemi në një katund dhe në mesin e saj është një kazan, këtë e vërteton ky debat idiot që nuk zhvillohet në 100 e ca vende, as në Amerikë, e zhvillojmë vetëm ne. E kuptoni që kam të drejtë kur them katund dhe kazan? Njëri thoshte po të isha mi do hipja në prapanicën e elefantit dhe s’do e zgjasja më… Ca bëhet këtu, ku jemi? Kjo është e vajtueshme! Ne e konsiderojmë zgjedhje të drejtë, ka qenë koherente dhe racionale. Shqipëria voton si BE-ja dhe ky vendim i është bërë i qartë të gjithëve. Nuk arrij ta kuptoj ç’është kjo idiotësi. Shqipëria ka një pozicion që e kanë vendosur ata që sot bëjnë kritika. Do thoni që disa vende të BE-së nuk i qëndruan asaj linje, kjo për arsye të tyre. Ka vende në BE që i bëjnë politikë dhe kanë konflikte me BE-në, ne s’jemi nga këto vende. Unë e kam shumë të qartë se sa e madhe është Shqipëria në glob. Jemi një vend i vogël, shumë i vogël madje dhe kemi disa pozicione, të cilat besoj janë pozicione dinjitoze. S’kemi pse jemi një vend edhe i vogël edhe qesharak! TIRANA TODAY
