Nesër është afati i fundit që vetë palët vendosën për miratimin e Reformës Zgjedhore. Përpos faktit që kërkon që rolin e Kolegjit Zgjedhor ta marrë Gjykata Kushtetuese, që të jetë kjo e fundit që të vendosë për fatin e zgjedhjeve pas apelimeve të palëve politike, PD ka kusht të panegociueshëm identifikimin biometrik në të gjithë vendin.
Kjo si e vetmja garanci e cila do të pengojë mbushjen e kutive të votimit. Nga ana tjetër e medaljes qëndron shumica socialiste, e cila është e mendimit se për këtë nuk ka kohë dhe garanci nga teknologjia, dhe pranon kushtin e pjesshëm. Pra që identifikimi biometrik të jetë vetëm në zona të caktuara.
Dje, ambasadori i BE-së në Tiranë, Luigi Soreca, ka reaguar në lidhje me Reformën Zgjedhore. Përmes një reagimi në Twitter, Soreca pohoi se me rëndësi është që të bëhet progres në Reformën Zgjedhore, ndërsa theksoi se mirëpret qëndrimin konstruktiv nga palët.
“E rëndësishme është që ka përparim në Reformën Elektorale në Këshillin Politik. Ne mirëpresim qëndrimin konstruktiv të ndërmarrë nga të gjitha palët, dhe i ftojmë ata të vazhdojnë të punojnë me qëllim të arritjes së një marrëveshje të përgjithshme deri më 31.5.2020. Ne duam që Shqipëria të ecë përpara drejt integrimit në Bashkimin Europian”, shkruan Soreca.
Nga ana tjetër, ambasadorja amerikane Yuri Kim, ka përshëndetur deklaratën e presidentit Ilir Meta, i cili apeloi palët politike që të përmbyllin Reformën Zgjedhore brenda 31 majit, pasi në të kundërt do të ketë pasoja të mëdha në procesin e integrimit. Teksa ka ripostuar deklaratën e tij në Twitter, Kim shkruan: “Faleminderit Z. President për inkurajimin tuaj!”.
