Ish-kandidati për deputet i Partisë Demokratike në Qarkun e Lezhës, Preç Zogaj i është rikthyer sërish denoncimit për vjedhjen e votave në zgjedhjet e fundit parlamentare.
Në një shkrimin drejtuar deputetit socialist të Lezhës, Pjerin Ndreu, në profilin e tij Facebook, Zogaj shpjegon se monedha euro filloi të përdorej në masë për të blerë votat e shqiptarëve, sa nisi të zhvlerësohej në treg.
Ndërsa pas zgjedhjeve ndryshoi tërësisht kjo tendencë. Ai thekson se vetëm kryeministri Edi Rama mund ta shpjegojë këtë paradoks, pasi sipas tij, vetë kryeministri u investua tërësisht në drejtim të blerjes së votës.
“Çështja e shitblerjes së votës në zgjedhjet e 25 qershorit nuk është një problem “fshati im, fshati yt”, por një problem i madh kombëtar. Në intervistën time jam ndalur te fakti i fakteve, zhvlerësimi i euros me tre lekë gjatë fushatës elektorale, fakt kokëfortë i tregut. Le t’u shpjegojë shqiptarëve kryeministri dhe ekspertët e tij ç’është kjo çudi, sa euro duhet të injektohen në tregun tonë në harkun e një muaji për të çuar në këtë zhvlerësim që nuk e arrin as sezoni më super i suksesshëm turistik (shikoni si po forcohet euro pas zgjedhjeve kur edhe startoi realisht sezoni turistik!). Përndryshe, nëse nuk kanë një shpjegim ekstra zgjedhor, duhet të mbajmë shënim se blerja e zgjedhjeve është investimi më i madh i qeverisë së koalicionit “Rama Një” gjate katër viteve. Ky është problemi që vetëm sa është cekur, por investigimi i kësaj maskarade nga forcat brenda vendit dhe nga partnerët e huaj do të vijë shpejt, nga maja deri në fund të piramidës, në fshatin me të fundit”, shkruan Zogaj.
