Ish-deputeti i Partisë Demokratike Oerd Bylykbashi ka reaguar ashpër ndaj KQZ-së lidhur me shifrat që ka publikuar për zgjedhjet lokale të 30 qershorit.
Bylykbashi ka deklaruar se KQZ-ja ka rritur shifrat e pjesëmarrjes dhe se është një tenxhere që shërben për të zier pilaf.
“KQZ-ja si tenxhere për të zier pilaf. Doli KQZ-ja dhe deklaroi sot, me një tis funebër, se në votimet e Ramës paskan votuar 812 mijë votues. Të dielën në darkë deklaroi se kishin votuar 772 mijë votues. E kishte shtuar me vetëm 40 mijë zgjedhës. Kjo shtesë më kujtoi gjyshen time kur isha fëmijë që preferonte orizin bullgar më shumë se atë të vendit sepse shtonte më shumë volum kur bëhej pilaf. Ja ku kanë përfunduar katër militantët e PS-së në KQZ, në kuzhinierë pilafi për drekën e vakisë së Ramës.
E mbajnë mbyllur KQZ-në dhe nuk japin asnjë shifër në kohë reale siç jepej dikur, qoftë edhe para dy vjetësh, kur rezultatet transmetoheshin të detajuara në kohë reale. Kësaj radhe sistemet elektronike të transmetimit dhe publikimit të të dhënave i kanë fikur ose nuk i kanë vënë fare në punë sepse transparenca nxjerr në shesh ç’po gatuajnë. Me pak fjalë, i kanë vënë kapak tenxheres me emër KQZ që të ziejë mirë pilafi. Tashmë të gjithë e dinë që vetëm 15 % i shkuan në votimet farse dhe 85 % e shqiptarëve ia refuzuan 30 qershorin. Të gjithë i kanë parë qendrat e votimit ku nuk hynte këmbë njeriu për orë të tëra, por ndërkohë KQZ rriste shifrat e pjesëmarrjes.
Dhe meqë në 2015-ën votuan 48 %, Rama dha urdhër që ta çonin pjesëmarrjen sa gjysma. Në mbrëmjen e 30 qershorit, edhe pse shifra e vetë KQZ-së tregonte 21 %, publikisht deklaruan 24 %, fiks sa gjysma e 2015. Por Rama e kuptoi që po i derdhej uji i pilafit që vlonte dhe e uli pak zjarrin. Sot deklaruan 22 për qind, ama katër kuzhinierët me përparëse zhul në KQZ ia kanë shtuar plot 7 % volumin e këtyre zgjedhjeve që i bënë pilaf. Rezultati i këtyre zgjedhjeve nuk ishte rezultati për partitë, por pjesëmarrja. Rama këtë pjatë i ka porositur kuzhinës së KQZ. Nuk thonë kot: një rezultat i vonuar është rezultat i gatuar”, shkruan ai.
