Dy persona të dyshuar për keqpërdorim të detyrës zyrtare gjatë zgjedhjeve në Komunën Veriore të Mitrovicës janë ndaluar nga Prokuroria e Shtetit. Ky lajm është bërë i ditur nga “Gazeta Express”. Dyshohet se të ndaluarit kanë lejuar që të votohet në kundërshtim me rregullat e Komisioni Qendror të Zgjedhjeve.
Mësohet se dy të ndaluarit janë komisioner, njëri kryesues i vendvotimit dhe zyrtari i identifikimit në qendrën e votimit 3805B/12D, në shkollën “Sveti Sava”.
“Ndalohen dy persona zyrtare për keqpërdorim të detyrës zyrtare gjatë zgjedhjeve
Prishtinë, 6 tetor 2019 – Prokurori i Shtetit njofton opinionin se në Mitrovicën e veriut, me urdhër të prokurorit, janë ndaluar dy persona të dyshuar se kanë kryer veprën penale “Keqpërdorim i detyrës zyrtare gjatë zgjedhjeve” nga neni 211 të KPRK-së.
Koordinatorja Nacionale për zgjedhje, Laura Pula, në koordinim me kryeprokurorin e Prokurorisë Themelore të Mitrovicës, Shyqyri Syla, pas marrjes së informacioneve se është lejuar votimi në kundërshtim me rregullat e KQZ-së, nga ana e dy komisionerëve, (kryesuesi i vendvotimit dhe zyrtari për identifikim në qendrën e votimit 3805B/12D, në shkollën “Sveti Sava”, në Mitrovicën e veriut), janë ndërmarrë të gjitha veprimet e nevojshme duke ndaluar të dyshuarit dhe duke kryer verifikimet procedurale”, thuhet në reagimin e Prokurorisë së Shtetit.
