Të dielën e 13 qershorit, do të mbahen zgjedhjet për kryetarin e ri të Partisë Demorkatike. Teksa na ndajnë vetëm pak ditë nga votimet, në selinë blu kanë mbërritur materialet zgjedhore, të cilat do të përdoren në qendrat e votimit në çdo degë të PD-së në vend.
Gjithçka duket gati në selinë blu, edhe pse akuzat kanë qenë të shumta nga kandidatët që janë përballë Bashës, pasi asnjë prej tyre nuk ka arritur të marrë listën e anëtarësisë.
Pas zgjedhjeve , Basha u përball me një sërë kritikash për rezultatin e 25 Prillit, të cilat pas 8 vitesh e lanë sërish në opozitë Partinë Demokratike dhe refuzoi të jepte dorëheqjen duke i cilësuar zgjedhjet një masakër elektorale.
I pari që njoftoi vendimin për të kandiduar ishte anëtari i Kryesisë Fatbardh Kadilli. Ai drejtoi gishtin e përgjegjësisë për humbjen, mbi kryetarin Basha dhe foli për nevojën e një opozite të re.
Pas tij vetëm, ishte Edit Harxhi, e mbështetur nga grupimi “Për PD-në” që gjithashtu ka kërkuar largimin e Bashës, dhe u fut në garë për të marrë drejtimin e partisë.
Vetëm në ditën e fundit kur dhe mbaronte edhe afati për dorëzimin e kanidaturave, në garë u fut edhe Agron Shehaj, deputeti i zgjedhur në Tiranë, i cili ishte i dyti më i votuar pas Bashës, në zgjedhjet e 25 prillit.
