Kryetari i Komisionit Zgjedhor në Partinë Demorkatike, Jemin Gjana ka komentuar zgjedhjet e 13 qershorit, që do të përcaktojnë kryetarin e ri të kësaj force politike.
Në lidhje me mos publikimin e të dhënave të anëtarësisë, Gjana u shpreh se kjo nuk është e mundur, pasi është e ndaluar me ligj, që një parti politike të bëjë publike të dhëna të tilla.
Deklarata e Gjanajt u bë ditën e sotme në emisionin ”Kjo Javë” në News 24. Ndër të tjera, Gjana tha se ekziston një ligj për mbrojtjen e të dhënave personale, i cili nuk e lejon publikimin e listave të personave fizikë për disa nga të dhënat personale që konsiderohen të dhëna konfidenciale sensitive.
Jemin Gjana: ”Kryesorja është cështje ligjore. Ne provuam një patronazhim të pushtetit, nuk bën sens të kalojmë në patronizhistë të partive. Ne kemi një ligj për mbrojtjen e të dhënave personale, i cili nuk e lejon publikimin e listave të personave fizikë për disa nga të dhënat personale që konsiderohen të dhëna konfidenciale sensitive. Kush janë këto të dhëna? Një listë që tregon përkatësinë etnike, përkatësinë racore, tregon pjesëmarrjen në sindikata, tregon përkatësinë fetare të personave, janë të ndaluara të bëhen publike pa u lejuar nga personi fizik. Nëse ne botojmë një listë, do të thotë kemi botuar një listë të përkatësisë politike të një grupi njerëzish. Nuk e kemi këtë të drejtë. Është e ndaluar ligjërisht. Pra, të dhënat e anëtarësisë në një parti politike, nuk mund të publikohen. Konsiderohet një prej të dhënave sensitive të personave.’’
