Kryeministri Edi Rama ka folur rreth datës së re të zgjedhjeve, duke thënë se kjo datë ka dalë nga Meta, pasi ai bashkë me opozitën nuk mundën ta vrisnin dot 30 qershorin.
Gjatë takimit të tij elektoral në Vorë, Rama garantoi se zgjedhjet do të mbahen më 30 qershor dhe se nuk do të ketë incidente.
Pjesë nga deklarata e Ramës:
“Meta vendosi ditë tjetër. Ose 21 i binte e hënë dhe të hënën nuk bëhen dot zgjedhje, ose fallxhorja e ka lexuar dyshin si dy ditë përpara ditëlindjes së Saliut. Ai po e kapi paniku, vetëm doktorin mendon. Në politikë ai është pacient i doktorit. Zgjedhjet do bëhen më 30 qershor.
Data e re doli sepse nuk u vra dot 30 qershori. Lajmi i ri i datës së re është se më 30 qershor ka për të pasur qetësi. Kjo punë ka vdekur. Duhet të dalin të gjithë masivisht në vota, edhe demokratët. Luli është aty, me ëndrrat e Lulit janë aty dhe me dështimet e Lulit do përfundojnë përherë”, deklaroi Rama.
