Në një intervistë për Radio Evropa e Lirë, kryeministri Rama është shprehur se për krizën politike zgjidhja është e qartë, “është zgjidhja që mbështet i gjithë komuniteti ndërkombëtar dhe patjetër edhe shumica dërrmuese e popullit shqiptar, që do të thotë që zgjedhjet janë të popullit dhe jo të politikanëve. Populli ka të drejtë të zgjedhë në ditën e përcaktuar nga Kushtetuta, dhe politikanët kanë detyrë të paraqiten përpara popullit. Kush nuk paraqitet përpara popullit është i lirë ta bëjë, por historia ka treguar që jo vetëm nuk fiton asgjë, por përkundrazi merr një kosto të madhe politike”.
Një kundërpërgjigje ka ardhur nga zëdhënësi i Presidencës, Tedi Blushi, i cili shprehet se “shumë dakord me kryeministrin. Zgjedhjet nuk janë të politikanëve, por të popullit. Demokracia dhe pluralizmi politik janë të panegociueshme”.
Pas këtij qëndrimi, reagimi i radhës ka ardhur nga Elisa Spiropali. Me anë të një komenti në Twitter, ajo shkruan: “Ilir Meta qenka dakord që zgjedhjet janë të popullit, po paska hallin e pluralizmit! Bukur. Pluralizëm dmth të gjithë në një mendje që populli vendos me zgjedhje dhe secili në mendjen e vet hyn apo s’hyn në zgjedhje! Pyetja që mbetet është: Pse nuk thotë gjë për dhunën Ilir Meta?”.
