Të paktën 10 645 biznese të reja janë regjistruar pranë Qendrës Kombëtare të Biznesit nga janari deri në korrik të këtij viti, sipas të dhënave zyrtare të Ministrisë së Zhvillimit Ekonomik, Turizmit, Tregtisë dhe Sipërmarrjes. Ato tregojnë për një numër që luhatet mes 1500 dhe 1800 përgjatë 5 muajve të parë, me një rënie në qershor dhe korrik.
Qershori është muaji më i ulët ndër gjithë muajt e tjerë të këtij viti, janë regjistruar 1213 biznese të reja. Njihet si muaji i zhvillimeve më të rëndësishme politike, zgjedhjet, të cilat kanë një ndikim të fortë në aspekte të tjera të ekonomisë sidomos tek investimet.
Korriku duket se e ka tejkaluar ngadalësimin e hapjes së bizneseve, ku edhe pse nuk janë arritur shifrat e janar-maj, janë përmirësuar në raport me qershorin. Në korrik numri i bizneseve të reja të regjistruara ishte 1422. Rekordin për numrin më të lartë ndër muajt e 2017 e mban janari me 1803 biznese të reja të regjistruara pranë QKB.
Megjithatë edhe pse në periudhën zgjedhore dhe post zgjedhore ka pasur ngadalësim të bizneseve të reja të regjistruara, muaji qershor mban rekordin e bizneseve të regjistruara me kapital të huaj.
Bizneset e regjistruara me kapital të huaj në qershor ishin 141 duke mbajtur 12 për qind të totalit të bizneseve të regjistruara atë muaj. Ndërkohë që shifrat e janarit dhe deri në korrik luhaten mes 94 dhe 121 biznese të reja me kapital të huaj. Në total për 7 mujorin janë hapur 820 biznese të huaja, ose gati 8% e totalit, shkruan Monitor.
Aktiviteti kryesor ekonomik i vendit është përqendruar në qarqet e Shqipërisë së Mesme, kryesisht Tiranë-Durrës. Tirana mban rreth 51 për qind të numrit total të bizneseve të reja të regjistruara në QKB gjatë këtij 7-mujori ndërkohë që Durrësi ka 11 për qind, ndjekur nga Vlora me rreth 10 për qind. Kjo e çon totalin e këtyre tre qarqeve në 72 për qind ndërkohë që pjesa tjetër ndahet mes nëntë qarqeve të tjera ndahet grupi i mbetur që është më pak se 28 për qind.
