Kreu i Partisë Demokratike, Lulzim Bashan ë takimin e zhvilluar ditën e sotme me strukturat e partisë në Sarandë, deklaroi se zgjedhjet vendore të 30 qershorit janë të paligjshme.
Ndër të tjera, Basha theksoi se objektivi i opozitës së bashkuar është zhvillimi i zgjedhjeve të parakohshme parlamentare dhe lokale, me një qeveri tranzitore, pa Edi Ramën kryeministër.
“Vendosmëri të plotë dhe me qartësi për objektivin që kemi përcaktuar: zgjedhje të parakohshme parlamentare, në një ditë me zgjedhje kushtetuese lokale, me një qeveri tranzitore, pa Edi Ramën kryeministër. Dhe me nxjerrjen para drejtësisë, të të gjithë personave që janë kapur duke vjedhur zgjedhjet e shqiptarëve, siç e kanë mësuar tashmë gjithë bota”, tha Basha.
Po ashtu, kreu demokrat shpalosi edhe planin ekonomik, teksa fajësoi qeverinë për rrënimin total social-ekonomik të vendit.
“Varfëria, papunësia, mungesa e mundësive në jetë vjen nga grabitja që po i bëhet Shqipërisë nga qeveria me një grusht klientësh.
− Shqiptarët po varfërohen sepse po grabiten.
− Shqipëria po plaçkitet dhe po shkatërrohet nga Edi Rama me një grusht biznesmenësh grabitqarë që ndajnë paratë dhe pasuritë me njëri tjetrin.
− E gjithë ekonomia dhe pasuritë e vendit janë në duart e këtyre pak njerëzve përreth Edi Ramës.
Bregdetin ua ka vjedhur qytetarëve dhe ja ka dhënë me vendime speciale oligarkëve që kanë ndërtuar në toka të vjedhura buzë detit.
− Deti ka qenë i shqiptarëve, bregdeti është i shqiptarëve por Rama ja u ka bërë dhuratë oligarkëve. Nuk ka ndodhur në asnjë vend të botës që të privatizohet deti dhe bregdeti.
− Deti duhet të ishte burim mirëqenie, burim të ardhurash për të gjithë shqiptarët. Por tani është vetëm për milionerët”, deklaroi ai.
