Ministrja e Infrastrukturës Belinda Balluku së fundmi ka qenë e ftuar në rubrikën Opinion në “News24”, prej ku komentoi vendimin e sotëm të Kolegjit Zgjedhor për të lënë në fuqi 30 qershorin si datën e zgjedhjeve vendore.
Ndër të tjera, Balluku theksoi se vendimi i Kolegjit është i pakontestueshëm: “Rëndësi kanë vendimet kushtetuese, vendimi i Kolegjit është i pakontestueshëm. Ne ndodhemi në fushatë zgjedhore të dekretuar nga Presidenti Meta. Në këtë rast mund të ishte dhe Gjykata Administrative, por Kolegji mendoj se ka të drejtën të shprehet në raste të tilla. E gjitha anullia e ngritur nga data e dekretit të Metës sot është larguar dhe kemi një vendim të qartë se zgjedhjet do të zhvillohen më 30 qershor. Interpretimi i këtij vendimi është i pavend nga të gjithë ne”.
Ndërsa lidhur me deklaratat e opozitarëve se do vijojnë protestat në gjithë Shqipërinë për një javë rresht, Balluku pohoi se opozita duhet të bëjë kujdes kur nxit luftë dhe veprime jodemokratike: “Zgjedhjet më 30 qershor nuk i vendosi qeveria Rama dhe as PS, janë zgjedhje brenda afateve kushtetuese të dekretuara nga Meta. Shehi apo kushdo tjetër nuk i ka seriozisht këto bërjet e luftës, duhet të kenë kujdes kur nxisin luftë dhe veprime jodemokratike”.
