Kreu i qeverisë Edi Rama, në një dalje për media është shprehur se protestat që mbajti opozita brenda dhe jashtë Kuvendit, janë një faturë të cilën do ta paguaj Shqipëria, e cila nuk e meriton.
“Dua tu kërkoj sot ndjesë të gjithë shqiptarëve pa dallim, por edhe partnerëve ndërkombëtarë për shfaqjen e sotme. Shfaqjen e sotme e dha opozita, por faturën e kësaj e merr përsëri e gjithë Shqipëria, e cila është më afër se kurrë çeljes së negociatave me BE-në dhe nuk i meriton as baltën as tymin një opozite që kruhet nga frika e Reformës në Drejtësi.”
Rama tha se kishte bërë sa mundur për ta sjellë opozitën në tryezën e dialogut dhe se nuk ishte zgjedhaj e mazhorancës zgjedhja e kryeprokurores së re në mënyrë të njëanshme.
“Zgjedhja e kryeprokurores ishte një zgjedhje tërësisht legjitim. Jemi në një moment shumë të rëndësishëm në Shqipëri, presim çeljen e negociatave për anëtarësim, çdo shfaqje si kjo e sotmja është një pikë e humbur.”
Më herët mazhoranca zgjodhi kryeprokurore të përkohshme, Arta Makrun, pavarësisht kundërshtimit të ashpër të opozitës me protesta brenda dhe jashtë sallës së Kuvendit.
Protestues të shumtë u përplasën me policinë jashtë Kuvendit, ndërsa disa deputetë opozitarë hodhën tymuese edhe brenda sallës së parlamentit.
Në një fjalim para protestueseve, Kryetari i Partisë Demokratike, Lulzim Basha, tha se opozita nuk do ta pranojë duarkryq puçin kushtetues dhe se ky është vetëm fillimi i kryengritjes popullore në mbrojtje të saj.
“Le ta dijë mirë Edi Rama, ushtarët e krimit dhe patericat e tij se populli shqiptar nuk do ta tolerojnë as nuk do ta falin, se ky është fillimi i kryengritjes popullore në mbrojtje të Kushtetues, në mbrojtje të drejtësisë së pavarur, e vetmja rrugë që Shqipëria t’i kthehet edhe një herë testimit të saj evropian. Askush të mos mendojë se do të rrimë duarkryq dhe do të pranojmë kokëheshtur puçin kushtetues”, tha Basha.
