Gjatë konferencës për gazetarët, Berisha komentoi firmosjen e dekretit të Metës për Bajram Begajn, për të cilën ish-kryeministri duket se ka ndryshuar qëndrim. Berisha ka mohuar që të ketë një krisje të marrëdhënies mes tij dhe Presidentit Ilir Meta. Ai thotë se në Kushtetutë nuk ka asnjë gërmë që ndalon firmosjen e dekreteve jashtë vendit. “Nuk ka krisje. Kushtetuta e Shqipërisë, në gërmë, nuk ndalon firmosjen e dekreteve jashtë vendit. Por raste unë di që nuk ndodhin. Tani të themi të vërtetën, Presidenti, mund të mos firmoste raundin e katërt, por të pestin nuk e digjte dot. Duhet të ushtronte detyrën Kushtetuese. Pasi ndërhyjnë mekanizma të tjera.
Ai nuk mund të mos ushtronte detyrimin Kushtetues të zhdegradimit, të nxjerrjes në lirim të Shefit të Shtabit të Përgjithshëm. Nuk ka ndodhur kurrë që të marrësh një ushtarak aktiv dhe ta bësh President, vetëm në rastin e juntave. Presidenti është i detyruar të përmbushë detyrimet Kushtetuese”, u shpreh Berisha.
Kreu i Partisë Demokratike, Sali Berisha, është shprehur se zgjedhja e Bajram Begajt si President i ri i Republikës, ka shënuar vendosjen e monizmit në vend.
Gjatë fjalës së tij, Berisha është shprehur se të gjitha pushtetet janë në dorë të një njeriu dhe të një qeverie. “PD deklaron se pas datës 4 Qershor, Rama vendosi nën pushtetin e tij dhe institucionin e fundit që kishte mbetur dhe në vend u vendos sistemi monist i plotë, dhe u varros sistemi demokratik. Sot, në Shqipëri, për herë të parë, pas 31 viteve të gjitha pushtetet janë në dorë të një njeriu të vetëm. Sot, si asnjëherë më parë, në pushtetin ekzekutiv është përfaqësues i vetëm një force politike, asaj të PS.
Sot, të gjitha institucionet e larta shtetërore, janë të zgjedhura vetëm nga PS. Sot, në këtë shtet monist të gjithë kryetarët e institucioneve më të lartë të drejtësisë, çdo gjyqtar përveç njërit që nuk i ka mbaruar mandati, janë të zgjedhur nga mazhoranca e PS. Sot, në Shqipëri të gjithë drejtuesit e komisioneve parlamentare janë deputetë të PS. Me zgjedhjen e Presidentit të Republikës u vendos monizmi. Në Shqipëri, 4-5 oligarkë zotërojnë mbi 35 për qind të ekonomisë shqiptare”.
