Kreu i grupit parlamentar të Partisë Socialiste, Taulant Balla, njoftoi se PS do t’i kërkojë kryetares së Kuvendit, shtyrjen e Konferencës së Kryetarëve, që do të diskutonte mbi agjendën parlamentare të zgjedhjes së Presidentit.
Ai ka shpjeguar se kjo shtyrje bëhet për t’i dhënë më shumë kohë grupeve parlamentare të opozitës, që të mund të bëhen pjesë e procesit. Kreu i grupit të socialistëve tha se ka rënë dakord me Fatmir Mediun dhe Mesila Dodën, që të shtyhet me disa ditë mbledhja e Konferencës së Kryetarëve për zgjedhjen e Presidentit. Sipas Ballës, kjo mbledhje është parashikuar që të mbahet të mërkurën e ardhshme, ku grupi i PS-së, do të ulet me Enkelejd Alibeajn, Fatmir Mediun dhe me Mesila Dodën për negociatat për emrin e ri të Presidentit.
“Një pjesë të grupeve parlamentare të opozitës kemi dakordësuar kërkesën nga Mediu dhe Doda për të pasur pak më shumë kohë në dispozicion. Kam informuar Grupin Parlamentar për spostimin me disa ditë të mbajtjes së Konferencës së parë të Kryetarëve. Më pas të vazhdojmë me parashikimet e kalendarit jo më vonë se 7 ditë se 4 maj.
Kjo shtyrje me 5-6 ditë i shërben të gjitha grupeve, edhe PD dhe dy grupeve të tjera si dhe grupit tonë. Për të qartësuar procesin e bisedimeve. Kushtetuta ka përcaktuar qartë nevojën e një dialogu për 3 raundet e para”, tha Balla.
“Është hera e parë që një mazhorancë që i ka numrat, hyn në bisedime për një President që përcakton unitetin e popullit. Koha në dispozicion deri të mërkurën tjetër të mund të zhvillohet Konferenca e Kryetarëve”.
