Pas BE-së, edhe OSBE apelon ndaj mazhorancës qeverisë që AMA të jetë një institucion i pavarur. Prezenca e OSBE-së i kërkon Parlamentit, të jetë e kujdesshme për procesin e zgjedhjes së kreut të AMA-s. OSBE-ja nënvizon rëndësinë e një procesi gjithëpërfshirës dhe transparent për emërimin e kryetarit dhe anëtarëve të rinj të AMA-s, për të garantuar që AMA ta përmbushë mësë miri misionin e saj. Ky është mesazhi i dytë në adresë të Parlamentit dhe qeverisë, pas kërkesës së BE-së, për të shtyrë zgjedhjen e drejtuesit të ri të këtij instituconi në shtator.
“Prezenca e OSBE-së në Shqipëri ka ndjekur procesin e zgjedhjes së kryetarit dhe anëtarëve të Autoritetit të Mediave Audiovizive (AMA). Po ashtu, ne kemi qenë në kontakt me aktorët përkatës, duke theksuar nevojën për një organ të pavarur të rregullimit të medias. Ne nënvizojmë rëndësinë e një procesi gjithëpërfshirës dhe transparent për emërimin e kryetarit dhe anëtarëve të rinj të AMA-s, për të garantuar që AMA ta përmbushë më së miri misionin e saj të ndjeshëm”, thuhet në reagimin e OSBE-së.
