Deputetja Rudina Hajdari, e cila dje shprehu haptazi zhgënjimin me tryezën e Reformës Zgjedhore, ka mbajtur sot një takim me anëtarët e shoqërive civile. Me ta ka ndarë shqetësimet lidhur me ecurinë e Reformës Zgjedhore.
Me një shënim në Facebook, ajo thekson se ndryshimi i sistemit zgjedhor nuk është vetëm çështje e partive politike, por e gjithë shqiptarëve. Hajdari shkruan se ndryshimi i sistemit dhe listat e hapura, janë shumë të rëndësishme.
“Çështja e ndryshimit të sistemit zgjedhor nuk mund ti takojë vetëm partive sepse është një çështje e gjithë shoqërisë. Prandaj sot u bashkova me Nismën Thurje dhe organizatat e shoqërisë civile për të ndarë me ta ecurinë e deritanishme të proçesit për ndryshimin e sistemit zgjedhor si edhe për të dëgjuar propozimet e tyre. Jam e lumtur që të gjithë e mbështetën pa kursime idenë e hapjes së listave dhe më inkurajuan që zërin e tyre ta çoj në Kuvend.
Opozita ka propozuar një mënyrë të re për të zgjedhur anëtarët e KQZ-së, ndërsa mazhoranca pretendon se është e ngjashme me formulën e tanishme. Dje Rudina Hajdari u largua nga mbledhja, me pretendimin se nuk po diskutoheshin gjëra të rëndësishme.
