Në Tiranë, drejtuesit më të lartë shtetërorë e politikë shprehën mbështetjen e tyre për zotin Ramush Haradinaj, pas dorëheqjes nga detyra e kryeministrit të Kosovës. Presidenti i Shqipërisë, Ilir Meta, shkroi në një mesazh publik se zoti Haradinaj është një burrë shteti, që nuk e thyejnë presionet e pabesitë. Presidenti Meta theksoi se ishte krenar për zotin Haradinaj dhe i bindur në pafajësinë e tij.
“Nga sot të gjithë duhet të flemë më pak, të shqetësohemi më shumë dhe të bashkohemi më fort që Kosova dhe rajoni ynë të jenë të pacënuar në paqen dhe sigurinë tonë, si dhe në të ardhmen evropiane”, tha zoti Meta. Ndërsa kryeministri Edi Rama tha se ftesat nga Haga për protagonistët e UÇK-së janë një sfidë e re e tyre për të provuar deri në fund pafajësinë. Sipas tij, këto ftesa janë një sfidë e papërfunduar kombëtare në anën e duhur të historisë, edhe sot 20 vjet pas luftës.
Kryetari i Partisë Demokratike të opozitës, Lulzim Basha, deklaroi se dorëheqja e zotit Haradinaj është akti i një njeriu që vë atdheun mbi gjithçka, dhe se askush nuk mund ta përdhosë dot luftën çlirimtare të Kosovës.
“Ramushi i ka shërbyer me vetëmohim Kosovës, në ditë të mira e të këqija. Ramush Haradinaj është vet Kosova e lirë, e pavarur dhe evropiane, ku bën pjesë edhe sakrifica sublime e familjes Haradinaj në altarin e lirisë”, tha Basha. Kjo është hera e dytë që Haradinaj jep dorëheqje nga posti i kryeministrit pas thirrjeve nga Haga mbi hetimet e krimeve të luftës. Edhe tani ai është zyrtari më i lartë i thirrur për t’u paraqitur në Hagë. /VOA
