Lideri i partisë Maori në Zelandën e Re, u përjashtua nga Parlamenti, ndërsa vallëzonte “haka”, një valle tradicionale, në mes të një debati të ashpër mbi të drejtat e vendasve.
Reagimi i tij erdhi pas diskutimesh me javë të tëra, në agjendën shëndetësore, me qeverinë, që vendosi rreth përfitimeve shëndetësore për fisin Maori, i cili ka një nga sistemet shëndetësore më të këqija të vendit, shkruan The Guardian.
“Propaganda dhe retorika raciste në lidhje me njerëzit autoktonë janë zhvilluar javët e fundit. Kjo nuk është vetëm fyese për këta njerëz, por gjithashtu cënon dinjitetin e Parlamentit.”
Pas fjalimit të tij, kryetari i Parlamentit ia ndërpreu fjalën duke i mbyllur mikrofonin. Më pas lideri i partisë reagoi duke kërcyer një pjesë nga vallja tradicionale e fisit Maori dhe më pas u largua.
Fisi Maori, të cilët përbëjnë rreth 15% të popullsisë së Zelandës së Re, u privuan nga pjesa më e madhe e tokës së tyre gjatë kolonizimit Britanik të vendit. Mijëra Maori kanë protestuar për të drejtat e tyre civile dhe sociale në vitet e fundit, duke kritikuar qeveritë se kanë dështuar në sigurimin e barazisë sociale dhe ekonomike.
