Pas hetimeve disa mujore, SHÇBA në bashkëpunim me prokurorinë kanë zbuluar dhe goditur një skemë mashtrimi, ku ishin të përfshirë dhe punonjës policie nga DVP Shkodër.
Hetimi zbuloi se disa shtetas që aplikonin për përfitimin e certifikatave si punonjës të shërbimit të SHPSF-ve, dyshohet se janë pajisur me dokumente të falsifikuara duke anashkaluar procedurat verifikuese e trajnuese të detyrueshme, si Akademia e Sigurisë, Shoqëritë Private të Sigurisë të licensuara për trajnime, si dhe Komisionin e Certifikimet në DVP Shkodër.
Në vijim të procedimit, Gjykata ka vendosur masën e sigurisë “Arrest në shtëpi” (për arsye shëndetësore), ndaj punonjësit të Policisë Nënkomisar V.N., me detyrë Specialist për Shërbimin ndaj të tretëve, në DVP Shkodër. SHÇBA, në bashkëpunim me Prokurorinë po vijojnë hetimet ndaj personave të tjerë të implikuar në këtë skemë mashtrimi dhe shpërdorimi detyre, si dhe ndaj shtetasve që kanë përfituar certifikata në kundërshtim me ligjin për ushtrimin e këtij profesioni në subjektet e SHPSF.
Ndër të tjera, SHÇBA u bën thirrje qytetarëve që të denoncojnë çdo rast abuzimi me detyrën të punonjësve të policisë.
