Hashim Thaçi do të dalë para Dhomave të Specializuara më datë 9 nëntor, në orën 15:00. Gjykata Speciale ka konfirmuar se në datën 9 nëntor, do të jetë dalja e parë e Hashim Thaçit në sallën e gjyqit të Dhomave të Specializuara të Kosovës (DHSK) në Hagë.
“Aktakuza kundër Hashim Thaçit u konfirmua më 26 tetor 2020. Ai u arrestua nga Zyra e Prokurorit të Specializuar më 5 nëntor, dhe u transferua në objektin e paraburgimit të Dhomave të Specializuara të Kosovës (DHSK) në Hagë, në të njëjtën ditë.
Aktakuza e ngarkon Hashim Thaçin me akuza për krime lufte, dhe krime kundër njerëzimit sipas të drejtës ndërkombëtare, për forma të ndryshme të përgjegjësisë penale. Aktakuza e redaktuar publike mund të lexohet këtu”, thuhet në njoftimin për media.
Sot, kryeministri i Kosovës Avdullah Hoti, gjatë mbledhjes së qeverisë tha se lufta e Kosovës ka qenë e drejtë dhe e pastër.
Hoti vlerësoi lartë luftën e popullit të Kosovës, teksa theksoi se populli i Kosovës iu bashkua UÇK-së dhe së bashku me aleatët çliruan vendin.
