Pas vrasjes së shtetasit Gramoz Nako, 57 vjeç, i cili u gjet i pajetë nga gruaja e tij në rrethana ende të paqarta, sot është gjetur i vetëvrarë edhe kunati i tij, Sefedin Zenellari.
Kur policia ka shkuar për ta shoqëruar në lidhje me ngjarjen e mbrëmshme, 71 vjeçari Sefedin Zenellari është mbyllur në dhomë dhe ka vrarë veten.
Ndonëse nuk ka informacion të saktë për vrasjen e 57-vjeçarit, Gramoz Nako, policia dhe grupi hetimor po hetojnë në pistën e grabitjes. Nga deklarimet e familjarëve në polici, mësohet se viktimës i janë marrë nga xhepi 13 mijë euro.
71-vjeçari u gjet i vetëvrarë në banesën e tij mëngjesin e kësaj të marte, në momentin kur policia po shkonte për ta shoqëruar në komisariat si person të dyshuar, apo që mund të kishte dijeni për vrasjen e Gramoz Nakos.
Policia thotë se 71-vjeçari jetonte i vetëm, dhe u vetëvra me pistoletë. Dyshohet se kjo armë është përdorur fillimisht në vrasjen e 57-vjeçarit Gramoz Nako. Ky i fundit u gjet i vdekur në banesën e tij në lagjen nr.7 të qytetit të Korçës, nga bashkëshortja e tij.
Njoftimi i Policisë së Korçës:
Në vijim të ngjarjes së ndodhur mbrëmjen e djeshme në lagjen nr 7, ku u gjet i vrarë me armë zjarri tip pistoletë, shtetasi G.N, 57 vjeç informojmë se:
Autori i dyshuar i kësaj ngjarje është kunati i tij, shtetasi S.Z, 71 vjeç, banues në Korçë, i cili mëngjesin e sotëm në momentin kur shërbimet e policisë kanë shkuar për ta shoqëruar në Komisariat, është vetvrarë me armë zjarri tip pistoletë, në banesën e tij ku jetonte i vetëm.
Grupi hetimor po punon për zbardhjen e plotë të rrethanave të ngjarjes.
