Zëvendëskryetarja e Gjykatës së Elbasanit, Enkeleda Kapedani, mori vemendjen për shkak të publikimit të videove në TikTok. Ajo shfaqet në automjet duke bërë poza seksi, duke treguar veshjet luksoze e duke dëgjuar muzikë, ndërsa në një moment tregon edhe gishtin e mesit. Këto video të publikuara në TikTok-un e saj, e rëndojnë edhe më tej pozicionin e magjistrates.
Videot bënë xhiron në rrjetet sociale, e ndërsa vetë ajo mohon që të ketë llogari në emrin e saj. Për publikimin e videove ia faturon fajin fëmijëve të saj të mitur, 5 dhe 7-vjeç. Teksa e hëna pritet të jetë dita kur Enkeleda Kapedani të dalë para qeverisë së gjyqësorit mbi kërkesën e ILD-së, Top Channel ka zbardhur raportin. Përveç veprimeve si pyetja e sekretarëve gjyqësorë, kamerat e sigurisë, është marrë në pyetje edhe magjistratja Kapedani.
Burimet shtojnë se gjyqtarja mohon kategorikisht të ketë llogari në rrjetet sociale, jo vetëm në “Facebook”, por edhe “Instagram” dhe “TikTok”. “Videot janë personale të miat”, deklaroi gjyqtarja.
“Ato mund t’i kenë hedhur fëmijët e mi, vajza dhe djali, njëri 5 dhe tjetri 7 vjeç”, ka thënë gjyqtarja. Deklarata e saj do të shqyrtohet në fillim të javës, bazuar në kërkesën për pezullimin e saj nga detyra.
Deklarata e saj bie ndesh me atë që ka thënë më herët për mediat. Vetë Kapedani, në një prononcim për Report Tv tha se videot janë sulm ndaj saj, për t’i prishur imazhin. Ndërsa thekson se nuk ndihet krenare për videot e publikuara, ajo kërkon ndjesë ndaj çdokujt që është ndjerë keq.
Për rastin reagoi ashpër edhe Ministrja e Drejtësisë, Etilda Gjonaj, e cila tha se këto janë shfaqje të pakomentueshme dhe se i ka kërkuar KLGJ që në 2019 verifikimin dhe marrje mase për të pas lirimit të një subjekti kriminal.
