Në Itali lajmi më i bujshëm sot, ishte heqja e shiritit të kapitenit nga krahu i Mauro Icardit. Samir Handanoviç do jetë ai që tani e tutje do të mbajë këtë detyrë të vështirë tek Interi.
Sulmuesi argjentinas prej afro tre muajsh nuk po kalon një moment të mirë, dhe kjo krizë e tij ka ardhur në momentin që nisën bisedimet për rinovimin e kontratës. Por jo vetëm ky ka qenë shkaku që e kanë çuar klubin të marrë këtë vendim.
“Fasha e kapitenit i është hequr Mauro Icardit për deklaratat e gruas së tij njëkohësisht edhe agjente e sulmuesit argjentinas. Agjentja e Mauro Icardit me deklaratat e saj shpesh ka sjellë ujëra të turbullt në kampin zikaltër prandaj ky është një vendim i gjithë dirigjencës zikaltër që në këtë mënyrë nuk mund të vazhdohet. Një vendim i fortë i Interit dhe një tregues i qartë që asgjë sështë mbi Interin.
Ky vendim është marrë ditë më parë nga e gjithë dirigjenca zikaltër dhe i është komunikuar sot Mauro Icardit. Sulmuesi argjentinas pritet të mungoj vetëm këtë ndeshje kundër Rapidit që ta marrë me qetësi vendimin e shoqërisë zikaltër dhe të reflektoj për të ardhmen e tij si zikaltër”, tha gazetari Gianluca Di Marzio për SKY.
